Policia e Vlorës ka finalizuar operacionin antidrogë, të koduar “Storm”. Në përfundim të këtij operacioni arrestohen në flagrancë 5 persona, njëri prej tyre Efektiv i Policisë Kufitare. Ndërsa mësohet se janë sekuestruar 25 kg e 630 gr lëndë narkotike, e llojit “Cannabis sattiva”.
Zyrtarisht, burimet e Policisë Vendore bëjnë të ditur se, Seksioni për Hetimin e Narkotikëve, në bashkëpunim me Sektorin e Shërbimeve për Çështjet e Brendshme dhe Ankesat (SHÇBA), në bazë të informacioneve të marra në rrugë operative, kanë bërë të mundur realizimin e këtij operacioni, duke kapur në flagrancë 5 persona.
Arrestimi i tyre shtetasve u bë nga Shërbimet e Policisë së Vlorës, pasi u kapën në flagrancë në rrugën nacionale në afërsi të fshatit Babicë – Vlorë, duke udhëtuar me automjetin tip “Ford Focus” me targë: AA415GL, në pronësi të shtetasit: Hasan Hysenaj.
Gjatë kontrollit të ushtruar në këtë automjet, Shërbimet e Policisë kanë gjetur të fshehur në mjet, një sasi me lëndë narkotike prej 25 kg e 630 gr, të llojit “Cannabis sattiva”, e cila ishte sistemuar dhe e ndarë në 6 thasë plastikë të zinj, fshehur në bagazhin e këtij mjeti, me qëllim transportin dhe shitjen e saj.
Të arrestuarit
1 – Hasan Hysenaj, 47 vjeç, lindur në fshatin Sevaster dhe banues në Vlorë (me detyrë: Trup Shërbimi në Stacionin e Policisë Kufitare Dhërmi, Drejtoria Vendore e Policisë Kufitare dhe Migracionit – Vlorë).
2 – G. H., 18 vjeç, lindur dhe banues në fshatin Sevaster.
3 – Ferdbent Hoxha, 66 vjeç, lindur dhe banues ne lagjen “28 Nëntori” Vlorë.
4 – Emiljano Lazaj, 29 vjeç, lindur dhe banues në fshatin Shkozë – Vlorë.
5 – Mjaftim Jonuzaj, 46 vjeç, lindur në fshatin Sevaster dhe banues në lagjen “4 Heronjtë” Vlorë.
Bllokuar dhe sekuestruar në cilësinë e provës materiale
– në total, 25 kg e 630 gr, lëndë narkotike “Cannabis”,
– një automjet tip “Ford Focus” me targë: AA415GL (në pronësi të shtetasit: Hasan Hysenaj),
– një automjet tjetër tip “Peugeot” me targë: AA478JV (në pronësi të shtetasit: Emiljano Lazaj),
– 5 aparate celularë.
