Ministria e Drejtësisë bën me dije se janë shkarkuar dy punonjës të Zyrës Vendore të Regjistrimit të Pasurive të Paluajtshme, Lushnje për shkak të shkeljes së rëndë në kryerjen e detyrës.
Pas denoncimit të ardhur në media nga ana e një qytetari, u kryen verifikimet e nevojshme lidhur me pretendimet e bëra publike.
Në përfundim, u konstatuan shkelje shumë të rënda në ushtrimin e detyrës nga ana e punonjësve D.LL dhe S.K, lidhur me regjistrimin e një pasurie në zonën e Ardenicës.
Menjëherë për punonjësit D.LL dhe S.K është dhënë masa e shkarkimit nga detyra si dhe rasti është kallëzuar në prokurori.
Ministri i Drejtësisë falenderon qytetarin për denoncimin e këtij rasti si dhe e fton publikun për të bërë prezent çdo konstatim për shkelje të ligjit nga ana e institucioneve publike në varësi të Ministrisë së Drejtësisë.
