Autoritetet italiane kanë shkatërruar një rrjet të trafikut të drogës në Itali, duke prangosur anëtarët e saj, mes të cilëve ishin edhe tre shtetas shqiptarë, që konsideroheshin si grosistet e mallit në Itali.
Mediat e vendit fqinjë raportojnë sot se në kuadër të operacionit ‘Il Boratto’, pas shumë hetimesh janë zbuluar lidhjet mes anëtarëve të rrjetit. Mes pjesëtarëve në pranga u vunë tre shqiptarët Edmond Vocaj, Klaudi Zefi dhe Shpëtim Dushkaj. “Sipas hetimeve, që u zbuluan pas kapjes së një shpërndarësi, rezultoi se ata ishin furnizuar nga banda shqiptare e përbërë nga Edmond Vocaj, Klaudi Zefi dhe Shpëtim Dushkaj. Këta rezultuan të ishin ‘grosistët’ e gjithë rrjetit të shpërndarësve, pasi ishin ata që bënin furnizimin e tyre më drogë” thonë burimet policore.
