Për të mos ngjallur dyshime, hiqej sikur shëtiste me gruan e tij dhe me nipin, por në të vërtetë, udhëtimet e shkurtra nga Trieste drejt një zone në Slloveni, shumë jo larg nga kufiri italian, nuk ishin vizita turistike.
58-vjeçari maqedonas Stojan Trajkovski, është një ndër meshkujt e arrestuar tre ditë më parë nga policia italiane për tregtim heroine dhe kokaine e destinuar për tregun e Trieste-s, shkruajnë mediat lokale.
Doza të lëndëve narkotike dyshohet se do t’u shiteshin të rinjve. Gjatë trafikimit të lëndëve narkotike ai ndodhej në shumicën e rasteve i shoqëruar nga nipi i tij 4 vjecar, kjo për të shmangur dyshimet ndaj tij.
Sipas hetimeve, ishte pikërisht gjyshi, ai që drejtonte trafikun, duke përfshirë në të edhe shpërndarës të tjerë droge.
Maqedonasi u arrestua të mërkurën, teksa ndodhej në automjetin e tij së bashku me nipin 4-vjeçar dhe bashkëshorten, e cila u arrestua gjithashtu, nën akuzën e trafikimit të lëndëve narkotike.
