Mbledhja e kryesisë së PD-së nuk ka kaluar pa debate pasi Basha ka publikuar emrat e kordinatorëve të PD në 12 qarqet e vendit.
Ervin Salianji, sekretari më i ri i PD-së deklaroi se ekipi nuk mund të përfaqësojë PD e transformuar pasi shumica e emrave vinin prej qeverisjes së mëparshme e cila humbi zgjedhjet.
“Lista që propozuat për t’i deleguar në rrethe janë figura të konsumuara. Mendoj se ka ardhur momenti që të dalë në pah ekipi “Basha”. Ne duhet të shkojmë në zgjedhjet e ardhshme me një fytyrë të re”, ka thënë Salianji.
Por përvec Salianjit kundërshtime për cilësinë e ekipit të ri të kordinatorëve ka pasur edhe Enkelejd Alibeaj.
Përgjigja e Bashës u ka dhënë fund diskutimeve. Ai tha se kriteri i përzgjedhjes së kordinatorëve ka qenë përvoja dhe se koordinimi është një cështje organizative brenda PD ndërsa imazhi elektoral është tjetër gjë.
