Foto Ilustruese
Fluturimi i fundit i helikopteri EC-145 me numër bordi 637, në inventarin e Forcave të Armatosura, ishte shërbimi i fundit që i bëri Policisë së Shtetit. Përpjekjet e ministres së Mbrojtjes Mimi Kodheli dhe e Shefit të Shtabit të përgjithshëm të Forcave të Armatosura Jeronim Baze, për ta servirur këtë fluturim si një “fluturim rutinë stërvitor”, fsheh një të vërtetë, më të madhe dhe të hidhur. Janë persona të repartit të Helikopterëve në Farkë, të cilët tregojnë dhe denoncojnë, se sot, sikurse dhe shumë herë të tjera më parë, ky helikopterë dhe të tjerë të kësaj njësie, dilnin për patrullim, vëzhgim dhe identifikim të parcelave të mundshme të mbjella më bimë narkotike.
Kjo “rutinë”, vazhdon të paktën që prej 22 gushtit të vitit 2014, kur në Dukagjin, u rrëzua nga të shtënat me armë, një helikopter patrullues i policisë. Që prej asaj kohe, këtë detyrë dhe këto misione i kryenin vetëm Forcat e Armatosura.
Misionet antidrogë të kundërligjshme të FA
Të njëjta burime nga njësia e helikopterëve të farkës, i cilësojnë misione të tilla të jashtëligjshme. Sipas tyre paligjshmëria qëndron jo vetëm në përgjegjësitë e strukturave, për vëzhgimin, identifikimin dhe zbulimin parcelave me bimë narkotike, por edhe në përgatitjen e personave që duhet të kryejnë misione të tilla, apo edhe në pajisjet dhe instrumentet që duhet të kenë helikopterët që marrin pjesë në këto tipe misionesh. Efektivët e ushtrisë nuk plotësojnë kushtet për të marrë pjesë në të tilla “fluturime rutinë”, ndërsa edhe pajisjet dhe instrumentet në helikopterët e tyre, për një gjë të tillë, mungojnë, sqarojnë të njëjtat burime.
“Ky helikopter nuk plotëson kushtet par monitorim, ai është projektuar për kërkim shpëtim dhe akoma më keq, i mungon edhe koshi për shpëtim, pasi nuk është blerë nga FA”, citohet më tej burimi.
Megjithatë, si ushtarakë, ata kanë qenë të detyruar të zbatojnë vetëm urdhrat, ndërsa të njëjtat burime shtojnë se prej rreth dy vjetësh, të gjitha hartat me hashash janë prodhim i tyre, pasi helikopterët e policisë nuk fluturojnë.
Helikopteri i ushtrisë i rezistoi sulmit me armë
Sikurse helikopteri i policisë, i rrëzuar në Dukagjin dy vjet më parë, edhe një helikopter i ushtrisë i cili merrte pjesë në atë mision, është qëlluar me armë zjarri nga toka, por për fatin e mirë i ka rezistuar tri plumbave, duke ju shmangur fatit të keq të helikopterit të policisë.
Lajmi i para dy vjetësh, i rrëzimit të helikopterit të policisë ishte më “i madh” se sulmi edhe ndaj helikopterit të ushtrisë. Për pasojë, ai lajm “i madh”, mjaftoi për të kamufluar e mbajtur të fshehur “atentatin” edhe ndaj helikopterit të FA.
Helikopteri (i vogli) i rrëzuar sot
