Ismail Mulleti
Stuhia e nisur nga publikimi i dokumenteve për atë që po merr gradualisht formë si tërmeti më i madh fiskal i të gjitha kohërave, sa vjen e përforcohet.
Ashtu siç u paralajmëruar fillimisht nga grupi i gazetarëve investigativë, që po punojnë me zbardhjen e dosjes voluminoze, skandali ka përmasa globale dhe të tilla pritet jenë edhe hetimet
Shqipëri- Ismail Mulleti është shqiptari i parë që përmendet në dokumentet e “Panama Papers”. Mulleti bashkë me avokatin izraelit Assaf Halkin kanë regjistruar kompaninë “GFI Technologies” në maj të vitit 2013 në ishullin e Anguilla në mënyrë që të investojë në kompanitë shqiptare të teknologjisë së lartë. Sipas disa dokumenteve të QKRsë, avokati Halkin dhe Ismail Mulleti rezultojnë të kenë ngritur në Shqipëri edhe kompaninë “IMAH” me seli në qendrën e biznesit në rrugën “Murat Toptani”. Shoqëria e themeluar në shkurt të vitit 2014 ka për administratore Entela Shehaj. Aty Ismail Mulleti dhe Assaf Halkin janë me pjesë të barabarta nga 45%. Mulleti nuk iu përgjigj pyetje së “Haaretz.com” në lidhje me investimet e kompanisë, por komentoi se qëllimi i biznesit është për të shitur pajisje teknologjike në fushën e karburanteve dhe shtoi se, të gjitha të ardhurat raportohen në organet tatimore izraelite. Kompania ishte regjistruar me qëllim marrjen e huasë nga banka, për të investuar në pasuri të paluajtshme në Evropë. Aktiviteti i kompanisë është i regjistruar pranë zyrës së taksave në Izrael.
Çfarë po ndodh në vende të tjera?
Reagimi i parë mbërrin nga Islanda. Emri i kryeministrit të këtij vendi del në dosjet e publikuara. Kaq ka mjaftuar që mijëra islandezë të hidhen në protesta duke kërkuar dorëheqjen e tij. Vetë kryeministri ka kërkuar një votëbesim në Parlament, që në valën e presionit të publikut, vështirë se do ta marrë.
Shtetet e Bashkuara- Departamenti i Drejtësisë tha se po studion informacionet nga 107 agjenci informative dhe organizata mbi dokumentat e kompanisë “Mossack Fonseca”.
Britania e Madhe– Publikimi i dosjeve udhëhiqet nga The Guardian dhe BBC. Që të dyja kanë raportuar për një bankier britanik, që jeton prej dekadash në Korenë e Veriut. Ai ka hapur një kompani financiare “offshore” sekrete, e cila besohet se është përdorur nga regjimi i Penianit për të shitur armë dhe për të financuar programin bërthamor të vendit komunist. Dhjetra donatorë, deputetë dhe financiarë që mbështetën ardhjen në pushtet të Cameron kanë lidhje me rrjetin e “parajsave fiskale”.
Rusi– Moska mohoi përfshirjen e Vladimir Putin në këto skema, duke i quajtur ato të pabaza dhe të bazuara në “putinofobi”.
Ukrainë– Deputetët e parlamentit po kërkojnë me ngul nisjen e hetimeve për presidentin Petro Poroshenko, emri i të cilit ka dalë në “Dosjen Panama”.
Kompania “Mossack Fonseca”– Nuk komenton raste të veçanta dhe këmbëngul se është një aktore e përgjegjshme e komunitetit financiar dhe sipërmarrës global dhe se nuk ka shkelur asnjë ligj.
