Prokuroria e Përgjithshme ka bërë ët ditur zyrtarisht se ka regjistruar procedimin penal për ngjarjet te Liqeni Artificial
Sipas një njoftimi për shtyp të organit qendror të akuzës, mësohet se “Prokuroria e Përgjithshme, në bazë të materialit të referuar nga ana e Policisë së Shtetit, ka regjistruar procedimin penal nr. 2/2016, për veprat penale ‘Kundërshtimit të punonjësit që kryen një detyrë shtetërore apo një shërbim publik’, parashikuara nga neni 235 i Kodit Penal, dhe ‘Organizimi dhe pjesëmarrja në grumbullime dhe manifestime të paligjshme’, të parashikuar nga neni 262 të Kodit Penal, për ngjarjen e datës 28.03.2016, ndodhur në zonën e Liqenit Artificial, Tiranë. Ndërkohë, Prokuroria e Përgjithshme, në bazë të referimit të Policisë së Shtetit, po kryen hetime në ngarkim të deputetit Gent Strazimiri edhe për ekzistencën e dyshimeve për kryerjen e veprës penale: ‘Prodhimi dhe mbajtja pa leje e armëve luftarake dhe e municionit”, parashikuar nga neni 278 i Kodit Penal’”, njoftohet zyrtarisht nga Prokuroria e Përgjithshme.
Sipas prokurorisë, “emri i deputetit Strazimiri është shënuar në Regjistrin e Procedimeve Penale të Prokurorisë së Përgjithshme në bazë të akteve paraprake të dorëzuara nga ana e Policisë Gjyqësore. Ndër të tjera, në këtë material është edhe deklarimi i shtetasit P. N., i paraqitur si ish-përfaqësues i një firme prodhimi armësh në Gjermani. Sipas deklarimit të tij, kompania që përfaqësonte, i ka dhuruar disa vite më parë një sasi armësh Ministrisë së Brendshme, një prej të cilave pretendon se është në posedim të deputetit Gent Strazimiri dhe ekspozuar prej tij në ngjarjen e datës 28. 03. 2016, në zonën e Liqenit Artificial, Tiranë”.
Prokuroria bën të ditur se objekt hetimi është edhe ligjshmëria e projektit të ndërtimit të këndit të lojërave te Parku i Liqenit Artificial.
“Ndërkohë, Prokuroria po vijon hetimet për persona të tjerë të përfshirë në ngjarjen e datës 28. 03. 2016, ashtu edhe për ligjshmërinë e projektit të ndërtimit të këndit të lojërave në zonën e Liqenit Artificial, në bazë të kallëzimit të dorëzuar nga përfaqësues të Shoqërisë Civile”, përfundon njoftimi zyrtar i Prokurorisë së Përgjithshme.
Pistoleta, Prokuroria e Përgjithshme regjistron procedimin penal për Gent Strazimirin
