Selia e Shenjtë e Kryegjyshatës Botërore Bektashiane ka organizuar faljen më të madhe bektashiane drejtuar paqes, mirësisë, urtësisë dhe dashurisë.
Me rastin e 25-vjetorit të rihapjes së Kryegjyshatës Botërore Bektashiane dhe 5-vjetorit të ndarjes nga jeta të ish-Kryegjyshit Botëror Bektashian, Haxhi Dede Reshat Bardhit, u organizua për nder të tyre falja e parë e madhe në Odeonin e Kryegjyshatës në Tiranë.
Kryegjyshi Haxhi Baba Edmond Brahimaj tha se në ditët e sotme emri i Zotit kërkohet të merret peng nga barbarët. “Barbarët nuk i lidh asgjë me fenë islame. Ata duan të njollosin vlerat tona universale. Larg barbarizmave të çdo lloji. Selia e shenjtë e Kryegjyshatës Bektashiane e ka radhitur veten në koalicionet kundër terrorizmit. Ne do të vazhdojmë të ngremë teqe të reja. Ne do të jemi kurdoherë të bashkuar, jo vetëm brenda besimit tonë, por dhe me besimet e tjera. Kjo falje e madhe që zhvillohet sot në këtë foltore i drejtohet paqes dashurisë dhe urtësisë njerëzore.” Është shprehur Haxhi Baba Edmond Brahimaj.
Në faljen e organizuar në Kryegjyshatën Botërore të Bektashinjve ishin të ftuar krerët e komuniteteve fetare, besimtarë dhe krerë të lartë të shtetit.
