Janë mbylluar aplikime për dekanët e shefa departamentesh në të gjitha fakultetet. Në pritje të shpalljes së listës zyrtare, ku do të votohet më 20 prill, Panorama zbardh emrat e kandidatëve që janë regjistruar në komisionin zgjedhor të Fakultetit të HistoriFilologjisë.
Ndërsa kanë mbetur pothuaj dy javë nga afrimi i zgjedhjeve, kandidatët zhvillojnë paralelisht në auditorë fushatën bindëse me kolegët, por edhe studentët, për t’i votuar.
Nga informacionet që disponon gazeta vihet re një fenomen lidhur me kandidatët që duan të drejtojnë departamentet. Nga pesë të tillë brenda Fakultetit të HistoriFilologjisë, katër prej tyre kanë paraqitur vullnetin për të drejtuar: Gazetarinë, Gjuhësinë, Historinë dhe Gjeografinë përkatësisht nga një kandidat.
Zyrtarisht, më 20 prill do të votohet vetëm për ta, pasi nuk kanë tjetër alternativë. Më konkretisht, Shezai Rrokaj, në pamundësi për të rikandiduar për të tretën herë për në dekanat, pas tetë vitesh kthehet në bazë, duke marrë përsipër drejtimin e Departamentit të Letërsisë.
Pas Shezai Rrokajt, një gjë është e sigurt. Fakultetin e HistoriFilologjisë do ta drejtojë një femër. Dy profesore, prej vitesh pedagoge fakulteti janë zyrtarisht në garë për postin e dekanes. Ndonëse ende të pashpallura zyrtarisht, sipas Panoramës Valentina Duka e Dhurata Shehri kanë konfirmuar kandidaturat e tyre.
Fakulteti i Histori-Filologjisë, Universiteti i Tiranës
Për dekanë: Dhurata Shehrri, Valentina Duka
Departamenti i Gazetarisë dhe Komunikimit: Mark Marku
Departamenti i Gjuhe-Letersise: Shezai Rrokaj, Adem Jakllari, Lili Sula, dhe Vjollca Osja
Departamenti i Historisë: Eva Hyskaj
Departamenti i Gjeografisë: Romeo Hanxhari
