Nxënësit e shkollës fillore në qytetin turk Gonen, monitorët e papërdorur të kompjuterëve i kanë shndërruar në fole për zogjtë.
Hasan Ucar, zëvendësdrejtori i shkollës fillore Golbas thotë se këtë shkollë e ndjekin rreth 600 nxënës dhe se, siç transmeton trt, të gjithë mësuesit janë përfshirë në aktivitete të ndryshme jashtëmësimore që kanë për qëllim zhvillimin e shkathtësive dhe të aftësive të dobishme tek fëmijët.
Nxënësit e kësaj shkolle angazhohen që nga objektet e vjetra dhe të hedhura të plastikës të bëjnë gjëra të dobishme.
“Pikërisht në këtë mënyrë kemi ardhur te ideja që fëmijët të bëjnë diçka të dobishme edhe nga monitorët të cilët nuk riciklohen. Kështu kanë krijuar shtëpizat e bukura për zogj. Në çati kemi vendosur dhjetëra shtëpiza të tilla dhe shkollën tonë tashmë e zbukuron cicërima e zogjve që vijnë në këtë shtëpizë”, tha Ucar.
Duke treguar kënaqësinë e fëmijëve kur kuptojnë se në mënyrë të dobishme kanë shpenzuar kohën, Ucar tha se kanë marrë shumë lëvdata për këtë lloj pune dhe se kanë inkurajuar edhe shkolla të tjera në Turqi që të ndjekin të njëjtën rrugë.
