Drejtoria Vendore e Policisë së Lezhës ka dhënë një informacion paraprakë për aksidentin e sotëm te tregu i Milotit.
Sipas policisë, mësohet se rreth orës 10.30 të ditës së sotme në Fushë Milot ka ndodhur një aksident me pasoja. Menjëherë në vendngjarje mbërritën shërbimet e policisë për ti dhënë ndihmën e parë të plagosurve , dhe për të filluar hetimin e ngjarjes.
Nga veprimet e para hetimore rezulton se një drejtues mjeti invalid, dhe pa leje drejtimi, Pashk Vokrri , 58 vjeç, banues në Pllanë, duke drejtuar mjetin tip “Benz” me targë AA 120 NI ka humbur kontrollin, dhe për pasojë është futur në tregun e Milotit.
Automjeti është i përshtatur për përdorim nga persona me aftësi të kufizuar dhe i modifikuar në mënyrë artizanale dhe nuk e kishte kaluar testin e kontrollit teknik. Teknikisht mjeti nuk duhej te dilte në qarkullim.
Drejtuesi i mjetit i cili ka shkaktuar aksidentin është ndaluar nga forcat policore. Grupi hetimor në vendngjarje vazhdon hetimet për zbardhjen e plotë.
Kanë humbur jetën
Llesh Marku, 70 vjeç,
Dila Marku, 57 vjeçe.
Kanë mbetur të dëmtuar
A. K., 40 vjeçe,
A. P., 50 vjeç,
Ll. M., 40 vjeç,
F. A., 21 vjeç.
