Një lajm për Përmetin, si një rreth pa asnjë ngjarje kriminale për një vit, po bën xhiro në mediat on-line. Por jo kudo në Shqipëri gjërat “shkojnë vaj” si në Përmet. Njoftimet zyrtare të policive vendore e provojnë këtë. Biles, në këto njoftime gjen fshatra, që janë ku e ku larg Përmetit.
Në njoftimin më të fundit të drejtorisë Vendore të Policisë së Elbasanit, njihesh me dy ngjarje kriminal, brenda 24 orëve të fundit, vetëm në një fshat…, në Godolesh.
Ngjarja e parë ka të bëjë me një “kërcënim” e “pengmbajtje”.
Për pasojë mësohet se, specialistët për Krimet në Komisariatin e Policisë Elbasan, bënë ndalimin e 44-vjeçarit Ali Bardhi, banues në fshatin Godolesh , Elbasan.
Ky person u ndalua nga efektivët e policisë, pasi dyshohet të ketë mbajtur rreth katër orë “peng” A. Ç., 21 vjeç dhe shtetasin E. H., 16 vjeç, të dy banues në fshatin Godolesh, Elbasan, me pretendimin se pasi janë futur në Ullishten në pronësi të tij, ia kanë dëmtuar.
Më pas dy shtetasit A. Ç., dhe E. H., janë lënë të lirë nga Ali Bardhi, pasi është paguar me një sasi prej 5000 lekë (të reja) nga familjarët e dy personave.
Ngjarja e dytë ka të bëjë me “një vjedhje”, sërish në Godolesh.
Për pasojë, mësohet se specialistët për Krimet në Komisariatin e Policisë Elbasan, bënë ndalimin e 37-vjeçarit Ervin Nasto, banues në Elbasan
Ky person, u ndalua nga efektivat e policisë, pasi në fshatin Godolesh, Elbasan dyshohet të ketë vjedhur disa vegla pune në banesën e Xh. B., 57 vjeç, banues në fshatin Godolesh, Elbasan.
Për të dyja ngjarjet, materialet i kaluan Prokurorisë së Rrethit Gjyqësor Elbasan për veprime të mëtejshme.
Përmeti asnjë ngjarje kriminale për një vit, Godoleshi Elbasanit dy të tilla për një ditë
