Foto Arkiv
Banorët e prekur nga ndërtimi i bulevardit të ri të Tiranës, në zonën e Stacionit të Trenit, kanë përshkallëzuar protestën e tyre sot. Ata kanë bllokuar rrugën pranë stacionit të trenit, si shenjë kundërshtimi i shembjes së banesave të tyre, si dhe moskompensim me vlerën reale të tregut.
Sipas banorëve, kryebashkiaku i Tiranës, Erion Veliaj nuk e ka pranuar kërkesën e tyre për ndërtimin e një pallati për këta banorë buzë bulevardit të ri që do ndërtohet. Ndaj sipas banorëve, e vetmja zgjidhje për ta është mosbindja civile.
“Është çmenduri që në demokraci të të nxjerrin me zor nga shtëpia. Jemi autoktonë, kemi lindur e po plakemi në këto shtëpi. Në rrugë nuk dalim kurrë. Protestë mosbindjeje civile, le të bëhet masakër”, kanë thënë banorët.
Ndërkohë, bashkia e Tiranës u ka lënë pesë ditë afat 10 familjeve të tjera që u kanë shkuar letrat për të liruar banesat pasi do iu shemben shtëpitë për t’i hapur rrugën projektit për ndërtimin e bulevardit verior të Tiranës dhe rehabilitimit të Lumit Tirana.
