BATUTAT/ Ben Blushi ironizon ministrat, Bashkim Finon dhe Alfred Pezën

Deputeti Ben Blushi nuk i ka kursyer sonte batutat ironike ndaj ministrave, por edhe deputetëve socialistë, Bashkim Fin e Alfred Peza. Deklaratat si kundërpërgjigje, Blushi i ka bërë në një intervistë për gazetarin Ilir Babaramo.
Sipas Ben Blushit, ministrat e qeverisë ‘Rama’ janë bërë qesharakë. Sipas Blushit ata nuk po bëjnë punën e tyre, por rendin se kush i pari të mbushë sallat me njerëz për mitingjet e Edi Ramës, që garon kundër vetes për kreun e PS-së.
“Këtu ke frikë të kërkosh punë. Janë futur të gjithë në fushatë për mbledhur sa më shumë njerëz për mitingjet e Ramës. Më vjen për të qeshur se janë bërë ministrat qesharakë. Dalin e thonë gjëra që nuk i besojnë”, tha Blushi.
Blushi gjithashtu i ktheu edhe një përgjigje Bashkim Finos, i cili e kishte kritikuar deputetin “kundërshtar” dhe kishte dalë pro kryetarit të PS Edi Ramës.
“Unë nuk kam bërë asnjë konsultë me Finon. Të gjithë këta kështu thonë kur duan të sulmojnë: E kam mik. Por këta vuajnë nga komplekse. Më tha mua pse nuk shqetësohesh se statuti zbatohet për zgjedhjet e delegatëve dhe shqetësohesh se statuti nuk zbatohet për zgjedhjen e kryetarit. Kjo nuk qëndron”, tha Blushi.
Ben Blushi e kishte edhe një batutë ironike për deputetin tjetër socialist, Alfred Peza.
Përgjigja ndaj Pezës erdhi pas denoncimit të disa ditëve më parë të Blushit, sipas të cilit një deputete socialiste u kërcënua nga njerëzit e Edi Ramës se do t’ia hiqnin vajzën nga puna nëse mbështeste atë.
Pas këtij denoncimi deputetit Alfred Peza ka deklaruar se, nëse Ben Blushi tregon emrin e deputetes dhe nuk merren masa për kërcënimin ndaj saj, ai do ta linte mandatin e deputetit.
Ben Blushi nuk ia ka kursyer edhe një batutë ironike Alfred Pezës.
“Unë dua që Alfred Peza të mbetet deputet. Duke qenë se unë e mbaj fjalën dhe nëse them emrin e deputetes, atëherë ai do të detyrohet t’i kthehet gazetarisë, nëse e mban edhe ai fjalën. Por nëse kjo ndodh, as gazetaria nuk do të fitojë ndonjë gjë më shumë, dhe as Parlamenti nuk do të humbasë ndonjë gjë më shumë”, u shpreh Blushi me ironi.