Kryetari i Komisionit për Garancitë Statutore pranë Partisë Socialiste, paralajmëron rrëzimin e kërkesës së një grupi deputetësh dhe figurash të njohura ndër vite të PS lidhur me zgjedhjet për kreun e partisë.
Alket Hyseni, kreu i këtij komisioni paralajmëroi për gazetën “Shqiptarja.com” se ky komision do të shqyrtojë përmbajtjen e kërkesës, e cila mund të ketë të bëjë me çështje jashtë vendimmarrjes së komisionit, çështje të cilat, mund të shqyrtohen vetëm nga Asambleja apo Kongresi. Nga ana tjetër Hyseni i quan kontradiktore qëndrimet e një prej kërkuesve, Ben Blushi, i cili më parë e kishte quajtur komisionin në fjalë pa mandat.
Një ngërç tjetër me të cilën mund të (mos)përballet ky komision është afati. Komisioni për Garancitë Statutore pranë Partisë Socialiste ka afat të mblidhet brenda 30 ditëve, që do të thotë se 30 ditëshi i këtij afati zgjate dhe pas datës 19 mars, datës së Kongresit të PS-së. Për pasojë, ky komision mund të mblidhet edhe pas Kongresit, por nuk mund të ketë vlerë.
Një grup socialistësh, deputetë dhe figura që kanë kontribuuar ne Partinë Socialiste, kërkojnë interpretimin e Komisionit të Garancive Statutore për 12 shkelje të Statusit të PS-së, siç është kapërcimi i mandatit të kryetarit Rama nga 4 në 7 vjet dhe të organeve të brendshme të PS-së, qendrore e lokale, nga 4 në 5 vjet.
Të udhëhequr nga ish-presidenti Rexhep Meidani firmëtarët e kësaj letre janë Ben Blushi, Arta Dade, Mimoza Hafizi, Ndre Legisi, Petrit Ago, Mark Nikolli, Namik Kopliku, Marko Bello, Tritan Kalo, Suzana Hakrama dhe Maqo Lakrori. Nga firmëtarët e kësaj kërkese katër janë aktualisht deputetë.
“Garancitë Statutore” në PS, paralajmëron rrëzimin e kërkesës së mbështetësve të Blushit
