Fermerët që përmbyten gati cdo vit si dhe në përgjithësi banuesit në fshat do të detyrohen të bëjnë sigurimin e pronës apo investimit brenda këtij viti.
Autoriteti i Mbikëqyrjes Financiare, lajmëron se është në përfundim procesi i diskutimit të ligjit për sigurimin nga katastrofave natyrore. Aktualisht ai është për shqyrtim në kompanitë e sigurimit.
Sipas projektit, rreziqet e mbuluara në këtë sigurim lidhen me dëmet nga tërmetet dhe pas tërmetet, zjarret e shkaktuara nga tërmetet, shpërthime të shkaktuara nga tërmetet, rrëshqitje të tokës të shkaktuara nga tërmetet, përmbytje, rrëshqitje të tokës apo fundosje të shkaktuar nga përmbytja. Sipas AMF, modeli më i mirë për t’u ndjekur në këtë drejtim është Turqia.
Gjatë periudhës 2013 – 2015, sigurimi i pronës nga përmbytjet zinte rreth 3% të vlerës totale të rreziqeve në kontratat e sigurimit të pasurisë.
Në bashkëpunim me Bankën Botërore, AMF është duke studiuar disa mundësi për struktura organizative apo skema financiare për sigurimin nga katastrofat. Kjo do të kërkojë një bashkëpunim midis disa institucioneve dhe përvojën e mëtejshme të ekspertëve në rajon dhe më gjerë, sipas monitor.
