Afro 1000 të burgosur në të gjithë vendin janë liruar dje në zbatim të ligjit për amnistinë. Drejtoria e Pergjithshme e Burgjeve njofton, se më datë 21.01.2016 hyri në fuqi Ligji Nr. 154/2015 “Për Dhënie Amnistie”.
Nga ana e Drejtorisë së Përgjithshme të Burgjeve u morën të gjitha masat për zhvillimin normal të këtij procesi në 23 institucionet e sistemit penitenciar, proces ky që nisi në orët e para të mëngjesit dhe ka përfunduar rreth orës 20:15 të mbrëmjes së djeshme. Thuhet në një njoftim të drejtorisë së Burgjeve. Si rrjedhojë e zbatimit të Ligjit “Për dhënie amnistie” kanë përfituar lirimin e menjëhershëm 968 persona të dënuar.
Drejtoria e Përgjithshme e Burgjeve thekson se procesi i zbatimit të Amnistisë ishte i suksesshëm dhe nuk është shënuar asnjë incident.
Shumica e të dënuarve që përfituan lirim ishin nga burgjet e Lezhës, Peqinit, Fierit, Korcës, RRogozhinës dhe Lushnjës.
Shqipëria ka 23 burgje në disa qytete të vendit.
