Janë 7 emra gjyqtarësh për 4 vende vakante për anëtarë KLD. Kandidaturat për zgjedhjen në organin më të lartë të gjyqësorit janë, Enejda Civici, Brunilda Kadi, Enkelejdi Hajro, Neritan Cena, Gerd Hoxha, Luan Hasneziri dhe Petrit Como. Midis këtyre emrave, në 14 dhjetor, Konferenca Gjyqësore do të votojë për 4 prej tyre, si anëtarë të rinj të KLD-së.
Rreth një muaj më parë, Këshilli Ekzekutiv i Konferencës Gjyqësore Kombëtare (KGJK), bëri të ditur se në përmbushje të detyrimeve Kushtetuese e Ligjore, vendosi të thërrasë mbledhjen zgjedhore të Konferencës Gjyqësore Kombëtare, në datën 14 dhjetor 2015.
Sipas këtij njoftimi të KGJK-së, mësohet se objekti i punimeve të kësaj konference do të jetë, zgjedhja e katër anëtarëve të rinj të Këshillit të Lartë të Drejtësisë, pas përfundimit të mandatit në të gjyqtarëve Dritan Hallunaj, Ilir Mustafaj, Flamur Kapllani dhe Tritan Hamitaj. Anëtarët e rinj, do të përzgjidhen nga kandidaturat që do të prezantohen nga gjykatat e rretheve gjyqësore.
Po kështu, KGJK bënë të ditur se objekt i kësaj mbledhje do të jetë edhe zhvillimi i votimeve për rinovimin e përbërjes së organeve drejtuese të KGJK., siç janë; Këshilli Ekzekutiv, Komisioni i buxhetit, Komisioni i etikës, verifikimit të mandateve dhe përmirësimit të vazhdueshëm profesional dhe Komisioni për marrëdhëniet me institucionet shtetërore, organizatat ndërkombëtare, mediat, organizatat jofitimprurëse dhe publikun.
KANDIDATËT/ Zgjedhjet për KLD, 7 emra për 4 vende vakant
