89 xhami në Shqipëri janë jashtë juridiksionit të Komunitetit Mysliman Shqiptar , këtë shqetësim Shërbimi Informativ Shtetëror e ka paraqitur në Komisionin e Sigurisë Kombëtare , ndërkohë që vetë Komuniteti Mysliman ka deklaruar se në total janë vetëm 9 xhami të shkëputura nga ky komunitet.
“Panorama” ka zbardhur pjesë të raportit sekret që iu paraqitën dje deputetëve gjatë mbledhjes me dyer të mbyllura nga zëvendësdrejtori i SHISH-it, Ylli Allushi. SHISH i ka quajtur si shqetësues që numri i lartë i xhamive jashtë kontrollit të Komunitetit Mysliman, kjo në kuadër të masave të antiterrorizmit dhe kërcënimet për sulme të mundshme nga ISIS. Gjatë raportimit në Komisionin e Sigurisë, mësohet se Shërbimi Informativ ka shprehur shqetësim dhe për buxhetin e alokuar nga qeveria për vitin 2016. Mësohet se SHISH i i ka quajtur të pamjaftueshme fondet e dhëna nga qeveria, duke evidentuar se rritja e vetme prej 60 milionë lekësh janë për të paguar agjentët e SHISH-it nëpër ambasadat në botë.
Për agjentët e SHISH-it në selitë diplomatike në buxhetet e shkuara pagesat bëheshin nga Ministria e Jashtme, por kjo e fundit i hoqi nga organika e saj, duke ia kaluar Shërbimit Informativ faturën financiare. Mësohet se Ylli Alushi në emër të SHISHit ka kërkuar më shumë investime në infrastrukturë dhe logjistikë, duke theksuar se kanë probleme me automjetet, pjesën më të madhe të të cilave e kanë jashtë funksionit.
