TAP ka nisur ndërtimin e gazsjellësit në territorin shqiptar dhe aktualisht në proces ndërtimi janë 7 rrugë ndihmëse (ecuria thuajse 20%) dhe sipas planit po përgatiten 8 ura (ecuria mesatarisht 8% sipas planit).
Deri tani projekti ka 440 persona të punësuar për ndërtimin e rrugëve dhe urave ndihmëse, rreth 260 persona janë punësuar për proceset e aksesit në tokë, ndërsa rreth 50 persona janë përfshirë në proceset e marrjes së lejeve, inxhinierike dhe përcaktimin e gjurmës së rrugëve dhe urave ndihmëse.
Nga ana tjetër, ngritja e këtyre veprave ka dhënë ndikim edhe në punësimin jo të drejtëpërdrejtë pasi janë përfshirë shumë biznese lokale të lidhura me proceset e TAP, që nga hoteleria, shkruan monitor.
Vetëm në këtë fazë, rehabilitimi i rrugës së Potomit ka shkurtuar gjatësinë e udhëtimit me një orë.
Në total parashikohet që të ndërtohen rishtazi dhe të rehabilitohen 150 km rrugë ndihmëse, ndërsa do të rehabilitohen 52 ura.
Për ndërtimin e tubacionit ( 215 km) do të përdoren 8,000 ngastra toke duke e çuar në 30,000 numrin e personave të ndikuar nga projekti.
Po sipas burimeve zyrtare parashikohet që të ndërtohet një stacion kompresorësh në Fier dhe një i dytë në Bilisht për kapacitet të shtuar 8 stacione valvulash bllokimi (BVS).
Tubacionet e TAP parashikohet të kalojnë në 570 rrugë, 440 lumenj dhe 1 hekurudhë (kryqëzime madhore dhe të vogla).
Sa i përket furnizimit me gaz, TAP është projektuar për të zgjeruar kapacitetin furnizues nga 10 në 20 miliardë metra kub në vit (ndoshta edhe më shumë). Në total ai do të ketë një gjatësi prej 878 km gjatësi, 105 km në pjesën detare.
