Pas itinerarit mesdhetar dhe ballkanik për refugjatët, tashmë është shfaqur edhe ai adriatik.
Mediat italiane shkruajnë duke cituar burime të inteligjencës se organizata kriminale, kryesisht shqiptare, janë duke blerë anije për të bërë transferimin e emigrantëve nga Shqipëria për në bregdetin italian.
Strategjia e trafikimit të qenieve njerëzore mbështetet në dy fakte. I pari konsiston në pamundësinë që refugjatët hasin gjatë dimrit në kalimin përmes itinerarit ballkanik. Fakti i dytë konsiston në lehtësinë që jep udhëtimi përmes detit pasi në këtë mënyrë evitohen pengesat e kontrollet e ashpra të vendosura nga Kroacia, Austria dhe Sllovenia.
Këto fakte janë bërë të ditura nga drejtoresha ekzekutive e Policisë së Shtetit Italian dhe e Zonës 4 të Policisë Kufitare, Irene Tittoni, e cila ka theksuar se pengimi i itinerarit ballkanik do të detyrojë refugjatët që tu drejtohen udhëtimeve përmes detit.
Të dhëna këto që japin një alarm shumë ta madh pasi përveç se ndalon itinerarin ballkanik, do të ndryshojë koston e emigrantëve. Agjencia europiane për menaxhimin e kufijve të jashtëm të shteteve të BE, Fronteks, konfirmon se si itinerari ballkanik do të ndryshojë drejtimin për në Itali përmes bregdetit shqiptar dhe grek.
Që nga 1 janari deri në 11 tetor të këtij viti janë rreth 950 mijë refugjatë që kanë ardhur në europë, kundrejt 245 mijë të vitit të kaluar.
Sipas gjasave nëse shqetësimi i ngritur nga Fronteks dhe drejtoresha ekzekutive e Policisë së Shtetit Italian do të konfirmohet, Shqipëria do t’i bashkohet vendeve të itinerarit ballkanik të refugjatëve. Vendi ynë pritet të përdoret si tranzit për në shtetin italian ku dhe bëhet destinacioni kryesor i refugjatëve pas bllokimit të kufirit nga Kroacia, Austria dhe Sllovenia.
Skafistët shqiptarë ngrenë “flotën” e tyre detare, marrin masa për trafikun e refugjatëve
