Kryeministri Edi Rama ka ndërprerë për disa orë pushimet për të zhvilluar një takim me drejtuesit socialistë në Kuç të Vlorës, ku në fokus ka qenë reforma e re territoriale.
Rama, së bashku me Arbian Maznikun dhe ministrin e Pushtetit Vendor, Ervin Demo, prej orës 12:00 ka zhvilluar diskutime me kryetarët e bashkive të qendrave të qarqeve lidhur me propozimin për ndarjen e re territoriale.
Rama ndodhet në lokalin e Dhimitër Kapajt, kryetarit të Këshillit Bashkiak të Himarës, një prej njerëzve të pushtetit lokal socialist, emri i të cilit është lidhur me përfitimin e sipërfaqeve të konsiderueshme të tokës publike.
Mazhoranca socialiste synon të reduktojë numrin e bashkive nga 61 në 46. Propozimi, megjithatë, është përballur me kundërshtime si nga kryebashkiakë të majtë dhe të djathtë, ashtu edhe nga komunitetet e zonave që preken nga ndryshimet.
Pavarësisht rezistencës, mazhoranca nuk duket se ka ndërmend të tërhiqet nga projekti. Objektivi i qeverisë është që reforma e re territoriale të miratohet në Kuvend deri në fillim të muajit tetor.
Për miratimin e saj nevojiten 84 vota, çka e bën të nevojshëm sigurimin e një shumice të cilësuar në Parlament.a.b
