Ne foto, Enton Nikaj ne makine prane bllokut te pallateve ku jetonte
Babai i Enton Nikat, djaloshit që mbeti i vrarë nga një sherr në Linzë me një grup tjetër kriminal, ka vdekur vetëm pak javë më parë. Sipas familjarëve të tij vdekja i ka ardhur nga një helmim për të cilin ende nuk është sqaruar asgjë.
Ende nuk ka hetim dhe vijojnë dyshimet për shkaqet e vdekjes së tij.
Ndërkaq dje është bërë edhe varrimi i Entonit i cili banonte në katin e tretë të një pallati në rrugën “Aleksandër Moisiu” përballë “Oxhakut”, në Tiranë u përcoll dje në 15:00 në varrezat e Tufinës.
Të pranishmit në ceremoninë e varrimit, por edhe fqinjët u shprehën se kishin respekt për djalin e lagjes, që sillej mirë me ta, shkruan “shqip”.
Ndërkaq, vajza e dajës së Nikajt tha për gazetën “Shqip” se “na e keni bërë djalin kriminel, sikur kushedi sa krime ka bërë. Ai ka qenë i dënuar vetëm për një vrasje dhe nuk ka bërë gjë tjetër”. Sipas saj, akuzat e tjera për grabitje dhe pjesëmarrje në bandën e Gaxhait ishin vetëm sajesa dhe të pavërteta. Më tej, të afërmit kërkuan nga policia që t’i arrestonte vrasësit dhe se Entoni ishte vrarë rastësisht, në përpjekje për të shuar sherrin mes shokut të tij dhe atyre që kërkonin paratë.
Në lidhje me udhëtimet e shpeshta të Nikajt në Turqi, makinat e shtrenjta dhe fotot me objekte luksoze, fqinjët thanë se nuk e dinin se me ç’merrej ai konkretisht dhe se nuk kishin dëgjuar ndonjëherë që ai të punonte.
Për problemet e tij me drejtësinë, fqinjët përgjigjen me frazën standarde “Po sikur s’dihet si janë këto punë”. Ndërkaq, efektivët e Policisë së Tiranës kanë marrë deklarimet e disa prej kushërinjve të Nikajt, për të mësuar lëvizjet e tij të fundit dhe kontaktet.
Në ceremoninë mortore në Tufinë, vihej re pjesëmarrja e shumë të rinjve me makina të shtrenjta. Nga burimet policore mësohet se ata ishin pjesë e shoqërisë së ngushtë të 30-vjeçarit dhe se dyshoheshin për disa vepra penale.
