ABC News publikon për herë të parë foton e çastit pak minuta para se autorët të ekzekutonin me një plumb në kokë Enton Nikajn, dje në një lokal në Linzë.
Kjo foto është marrë vetëm pak çaste para vrasjes së 30-vjeçarit Enton Nika pak pas mesditës së të mërkurës në parkimin e restorantit Muraga në zonën e Linzës. Ky moment është fiksuar nga kamerat e sigurisë, pamjet e të cilave u kanë shërbyer hetuesve për të identifikuar autorët e dyshuar.
Hetuesit thonë se, nga këqyrja e kamerave të sigurisë shihet qartë se si është zhvilluar dinamika e ngjarjes në parkimin e restorantit. Në pamje shihet dhe momenti kur një person nxjerr pistoletën por ende nuk është zbuluar se kush ka qëlluar me një plumb në kokë Enton Nikën.
Burime nga policia e Tiranës thonë se tashmë ka një të dyshuar për vrasjen e ndodhur. Ai është shtetasi E. Martinaj ndërsa po punohet për ndalimin e tij. Burime nga policia thonë se janë shoqëruar 40 persona të cilët mund të kenë dijeni mbi motivet dhe mënyrën se si u zhvillua ngjarja. Sipas bluve pista kryesore ku po hetohet është ajo e borxhit që i plagosur Ismet Gaxherri i kishte shtetasit Martinaj. Nga kqyrja e sistemit TIMS rezulton se, shtetasi i dyshuar Martinaj të jetë akoma në Shqipëri, pasi dalja e fundit e tij jashtë vendit rezulton të jetë në 24 gusht të këtij viti.
Ndërsa viktima e kësaj ngjarje 30-vjeçari Nika rezulton të ketë dalë nga Shqipëria në datën 12 tetor dhe ka udhëtuar drejt Turqisë. Në të dhënat e sistemit TIMS ai është kthyer në vend në datën 23 tetor. Hyrje – daljet e Nikës do të hetohen nga Prokuroria për të parë nëse mund të përftohen të dhëna të vlefshme për hetimin. Hetuesit thonë se një pistë është ajo e konflikti të çastit megjithatë kjo ka pak mundësi duke pasur parasysh të shkuarën kriminale të personave të përfshirë.
