Policia e Vlorës ka goditur dje një tentativë për trafik droge drejt Italisë duke arrestuar një person, sekuestruar një gomone dhe një furgon ndërkohë që një tjetër person është shpallur në kërkim.
Në bazë të informacioneve të marra në rrugë operative në drejtim të trafikimit të lëndëve narkotike, policia e qytetit realizoi një operacion në zonën e Radhimës ku kapi në flagrancë në vendin e quajtur “Cekodhimë”, një automjet furgon me targë AA619AJ dhe brenda mjetit u sekuestruan 808 kg lëndë narkotike Cannabis Sattiva.
Shërbimet e Policisë së Vlorës në bashkëpunim me Drejtorinë e Policisë Kufitare dhe të strukturave të Policisë italiane, nukli detar NUFROM të koordinuar nga Zyra e Interforcës, pasi janë organizuar në territorin tokësor dhe detar, në një distancë rreth 1 km larg furgonit gjetën të braktisur një mjet lundrues gomone me mbishkrimin “Tëenty-six”.
Brenda mjetit lundrues janë konstatuar 5 bidona me karburant.
Nga kontrolli në afërsi të gomones pranë vendit të quajtur Bar-Restorant “Gjimaraj”, janë gjetur 7 çanta të hedhura në bregun e detit, brenda të cilave kishte lëndë narkotike kanabis.
Në total, lënda narkotike ishte 808 kg, e ndarë në 40 pako të mbështjella me letër plastike të tejdukshme.
Pas kryerjes së veprimeve hetimore u identifikua dhe kap në flagrancë pronari i automjetit, shtetasi Alban Koshi, 48 vjeç, banues në Vlorë.
Gjithashtu Policia ka shpallur në kërkim pronarin e mjetit lundrues, shtetasin R.M. 42 vjeç, banues në Vlorë.
Policia po vijon hetimet për zbulimin e personave të tjerë të përfshirë në këtë rrjet trafikimi të lëndëve narkotike.
