Kryetari i opozitës, Lulzim Basha akuzoi sot sërish kryeministrin Rama për kontrabandën në dogana e tatime dhe gropën financiare që u regjistrua edhe në tetor.
Në një fjalim të mbajtur në grupin parlamentar, kryetari i PD-së Basha tha se edhe për muajin tetor janë mbledhur 35 milion USD më pak se sa ishte parashikuar.
“Sipas kokoshit poturembushur dhe krenarë do sillnin në arkën e shtetit 350 milion USD më shumë. Ndihma ekonomike rezulton 3.8 miliard më pak se e njëjta periudhë e vitit të kaluar. Dogana është pusia ku banda e Edi Ramës kontrollon kontrabandën e cigareve dhe naftës. Kontrabandistët njihen me emër tashmë. Ky është kryekontrabandisti. Të gjitha emërimet e reja në dogana dhe tatimeve janë bërë në funksion të ballëve, kokëdhimëve, braceve. Vidhet në dogana e tatime, por vidhet më shumë në tendera. Gjysma e tenderave janë bërë me prokurim të drejtëpërdrejtë me qëllim që fituesit e paracaktuar të shpallen në zyrën e Edi Ramës”, tha Basha.
Sipas tij “Shqiptarët po e mësojnë deri në fund se Rama dhe ministrat e tij e zhdukën de facto garën, e zhdukën de facto tenderin. E zhdukën për të vjedhur, për asgjë tjetër. Vetëm javën e fundit kemi denoncuar 22 tendera të pastër korruptiv të klikës së Qeverisë”.
Gjithashtu Basha akuzoi kreun e qeverisë edhe për tenderat që i ka dhënë miqve të tij, përfshir këtu edhe dy djemve të Valentina Leskajt.
“Shqipëria ka nevojë për pastrim, por pastrimi nis me Edi Ramën, pisat dhe hajdutët. Me dajakun një dorë dhe duke grabitur pasuritë publike në dorën tjetër kjo qeveri s’mund të prodhojë zhvillim por vetëm rrokulliste. Qytetarët e kuptuan se kjo bandë ishte e djegur për pushtet dhe erdhën me mashtrime. Fryma për mosbindje civile po ngrihet në mbarë vendin. Askush nuk mund të pranojë më një qeveri që jo vetëm ka gënjyer për të gjitha premtimet, por edhe vjedh pa pushim.
