Investimi më i madh për ndërtimin e rrjetit të kanalizimeve dhe përpunimit të ujërave të zeza të kryeqytetit pothuajse ka dështuar. Janë jo pak, por rreth njëmbëdhjetë miliardë jene japoneze hua e qeverisë japoneze që janë humbur.
Tashmë ka përfunduar afati i kontrates 7 vjcecare, të miratuar në parlament, por zbatimi i këtij projekti mjaft të rëndësishëm për kryeqytetin nuk është kurrkund.
Ministria e Transporteve e cila është kontraktuese e kësaj huaje e ka djegur tashmë këtë fond, më të madhin e nënshkruar deri më sot për investime në këtë fushë.
Sipas Ministrisë së Transporteve, disbursimi i kredisë së miratuar për këtë qëllim nga Qeveria Japoneze aktualisht është realizuar vetëm deri në masën 35 %. Pra 65 % e fondeve të kësaj kredie është akoma e pakonsumuar dhe tashmë konsiderohet e humbur pasi marrëveshjes i ka përfunduar afati. Sipas ligjit disbursimi përfundimtar i huasë duhet të bëhet jo më vonë sesa e njëjta ditë dhe muaj, shtatë (7) vjet pas datës së hyrjes në fuqi të Marrëveshjes. Por edhe pse ministria deklaron se 35 për qind e huasë është tërhequr, në terren nuk shikohet që të jetë kryer as 1 e treta e projektit. Deri tani ka përfunduar vetëm faza e mobilizimit të kantierit dhe është vënë në punë impianti i prodhimit te betonit.
Ende nuk është bërë ndërtimi i kolektorit kryesor nga ura e shkollës teknologjike deri në Impiantin e pastrimit në Kashar. As puna për ndërtimin e Kolektorit të ri të grumbullimit të ujerave të ndotura në krahun jugor të lumit të Lanës siç parashikon projekti.
Kjo ecuri punimesh vë në pikëpyetje nëse ky projekt do të përfundojë për t’i shërbyer 350 mijë banorëve siç është parashikuar në projekt. Për të vazhduar investimin qeveria do të duhet të rinegocioje për huanë, si dhe për normën e interesit apo kushtet e shlyerjes së këtij borxhi.klantv
