Vila e shndërruar në laborator, ku u bllokua droga
Rreth 700 kg lëndë narkotike kanabis sativa janë sekuestruar nga Policia e Durrësit gjatë një operacioni antidrogë paraditen e sotme. Si rezultat i këtij operacioni, kanë rënë në pranga 7 persona.
Gjithashtu, një laborator i përpunimit dhe paketimit të kanabisit u zbulua nga Policia në qytetin e Durrësit. Operacioni i koduar “Koordinata” u krye në bashkëpunim edhe me Drejtorinë e Policisë së Shkodrës dhe Tiranës.
Policia e Durrësit përmes një njoftimi zyrtar deklaron se operacioni është duke vijuar në terren në zonë e ish-Kënetës, aty ku u zbulua laboratori. Policia ka thënë paraprakisht se droga u gjet në një banesë në zonën e ish-Kënetës. Ende nuk ka të dhëna zyrtare për emrat e të arrestuarve, por mësohet se në mesin e të prangosurve ka biznesmenë nga Tirana, Shkodra dhe Durrësi.
Policia thotë se nga ky aksion ku janë përfshirë efektivë nga tre drejtori policie, priten arrestime të personave të tjerë të përfshirë në këtë veprimtari kriminale.
Nga hetimet paraprake dyshohet se kanabisi sigurohej nga Tirana dhe Shkodra, përpunohej në Durrës dhe trafikohej jashtë Shqipërisë, me destinacion kryesor Italinë. Sipas policisë ata dyshohet të jenë pjesë e një rrjeti trafiku të drogës,e për këtë po vijojnë hetimet pasi mund të ketë edhe arrestime të tjera.
Hetimi për zbulimin e këtij grupi është kryer në bashkëpunim me Prokurorinë e Krimeve të Rënda.
