Nënkryetari i Partisë Demokratike, Edmond Spahot theksoi se PD do t’i shkojë deri në fund hetimit të çështjes së CEZ-it, pavarësisht refuzimit të kryeministrit dhe të mazhorancës.
Sipas Spahos, kryeministri Rama dhe zëdhënësit e tij, faljen e 600 milion eurove nga xhepat e shqiptarëve, kompanisë CEZ, ata e quajnë marrëveshje të mirë. Nënkryetarit i PD tha se sa më shumë bëjnë avokatin, aq më shumë identifikohen si autorët e vjedhjes së shekullit.
Deklaratë e nënkryetarit të Partisë Demokratike, Edmond Spaho
Ka vetëm një njeri sot, që marrjen e 600 milionë eurove nga xhepat e shqiptarëve dhe faljen e kësaj shumë kompanisë CEZ, e quan marrëveshje të mirë. Ky është Edi Rama, i cili edhe mbrëmë, përmes zëdhënësit të tij Gjiknuri, sërish e cilësoi marrëveshje të mirë. Për Edi Ramën, zëdhënësin e tij, e kushdo tjetër që është përfshirë në aferën më të madhe korruptive në historinë e vendit kjo është një marrëveshje e mirë. Të ndash 600 milionë euro në një kohë kur kryeministri e soji i tyre janë sulur për të vjedhur e zhvatur, është patjetër një marrëveshje e mirë. Sa më shumë e mbrojnë, sa më shumë bëjnë avokatin, aq më shumë identifikohen si autorët e vjedhjes së shekullit. Opozita, Partia Demokratike e denoncoi të nesërmen e 31 korrikut, ditën kur kjo marrëveshje kriminale me CEZ kaloi në parlament përmes deputetëve kartona. Avokatët ndërkombëtarë të qeverisë i rekomanduan Edi Ramës jo vetëm të mos falë këto 600 milionë euro, por i thanë se ekzistojnë të gjitha rrethanat për të pretenduar 2 miliardë euro prej kompanisë CEZ, për shkeljet që ajo i kishte bërë kontratës. Shtypi, agjensitë ndërkombëtare hetuan e nxorën të palarat në shesh. Së fundmi, Kontrolli i Lartë i Shtetit, ka konstatuar se me marrëveshjen me CEZ, shtetit, qytetarëve të këtij vendi, u është bërë një dëm prej 479 milionë eurosh. Këtu përfshihen detyrimet e njohura prej kompanisë, që u falën. Përfshihen edhe 95 milionë eurot që qeveria ia dha në fund në dorë kompanisë, si shpërblim për këtë marrëveshje kriminale. Pra i dha edhe 95 milionë euro, pasi ndau me të qindra miliona euro të tjera. Çdo faktor jashtë këtij pakti, avokatët ndërkombëtar, opozita, shtypi, kontrolli i lartë i shtetit, qytetarët e vendit, e denoncojnë skandalin më të madh financiar të vendit. Vetëm për Edi Ramën kjo është një marrëveshje e mirë dhe e mbron me çdo kusht. Por është i izoluar, i rrethuar në krimin e tij. Hetimi do të bëhet. Kjo çështje do të zbardhet deri në fund. Këto para janë pasuria e vendit, me të cilat është bërë pazar për tu mbushur xhepat e Edi Ramës dhe skotës se tij. Nuk janë letra që rriten në kopshtin e saraveje të Surrelit. Janë mundi, djersa gjaku i shqiptarëve. Janë para që nuk shkojnë për rritje rrogash e pensionesh, për rrugë e spitale, për kopshte e çerdhe, për krijimin e vendeve të punës. Janë para që u takojnë shqiptarëve, që u janë marrë me dhunë nga Edi Rama. Por nuk kanë për ta mbyllur dot këtë aferë pavarësisht se edhe dje refuzuan hetimin nderkombëtar duke mos pranuar futjen ne kalendarin e punës të Kuvendit të propozimit të Partisë Demokratike për këtë qëllim. Paratë do gjenden, përgjegjësit do shkojnë para ligjit. Bashkë me zbardhjen e këtij skandali, do të zbardhë një ditë e re për vendin, demokracia e re, ku qeveria vendos bashkë me qytetarët dhe prihet nga interesat e tyre.
