Këshilli Ekzekutiv i UNESCO-s sot në rend të ditës do të ketë propozimin me rekomandim për pranimin e Kosovës anëtare të kësaj organizate. Por ky vendim nuk ka kaluar lehtë, pasi ka patur debate dhe mospajtime rreth vendimit që pranimi i Kosovës në UNESCO të përfshihet në rend të ditës. Disa nga përfaqësuesit qe e kanë kundërshtuar janë ata të Rusisë, të Kinës, të Kubës dhe të Argjentinës. Për propozimin rreth pranimit të Kosovës në këtë organizatë mund të votohet rreth datës 20 tetor, para përfundimit të mbledhjes së Këshillit Ekzekutiv që do të zgjasë deri më 22 tetor. Vendimi merret me shumicë votash.Vendimi përfundimtar për pranimin e Kosovës anëtare të UNESCO-s merret në Konferencën e Përgjithshme të UNESCO-s , që mblidhet më 3-18 nëntor. Konferenca e Përgjithshme përbëhet nga 195 vende anëtare dhe 6 të asocuara, ndërsa për pranim duhen dy të tretat e shumicës. Kërkesën për pranim të Kosovës në UNESCO formalisht e ka parashtruar Shqipëria, ndërsa është përkrahur nga 45 vende, ndër to SHBA, Gjermania, Britania, Franca, Austria, Sllovenia, Irlanda, Holanda, Luksemburgu, Danimarka, Finlanda, Suedia, Turqia si dhe Estonia, Letonia e Lituania. Po ashtu është mbështetur edhe nga Emiratet e Bashkuara Arabe, Arabia Saudite, Katari, Kuvajti, Bahreini, Belizi, Burkino Faso, Çadi, Kostarika, Bregu i Fildisht, Republika Domenikane, Salvadori, Gaboni, Gambia, Gana, Grenada, Guineja, Haiti, Hiondurasi, Jordania, Lesoto, Omani, Panama, Papua Guineja e Re, Senegali, Somalia , Sudani Jugor, Togo, Tanzania dhe Vanuatu.
Rusia kundër pranimit të Kosovës në UNESCO
