Nuk kanë munguar mëdyshjet e mëdha se ndeshja Shqipëri-Serbi ëhstë trukuar nisur nga fakti që dy gola u realizuan në tri minutat shtesë të ndeshjes ndërkohë që bastet kanë pasur luhatje jo normale.
Jo vetëm në rrjetet sociale por edhe dalje televizive u hodh mundësia e trukimit si shkak i humbjes së rëndë të ekipit shqiptar në Elbasan Arena. Një nga të ftuarit në “Zonë e Lirë”, Enea Fezaj shprehu dyshimet për një trukim të mundshëm të ndeshjes Shqipëri-Serbi.
Sipas tij një ditë para ndeshjes Kombëtarja jonë e futbollit kuotohej nga kompanitë e basteve (madje edhe në ato Serbe) si favorite me një luhatje të vogël nga 2.2 – 2.45, për fitoren e ekipit tonë.
Pak para fillimit të ndeshjes është bërë favorit ekipi serb dhe për fitoren e Shqipërisë kuotat kanë shkuar nga 2.2- 2.45 në 3.1 – 3.5.
Faktikisht në disa kompani në minutën e 90 bastet që kuotonin Shqipërinë si humbëse shkuan në 8. Kjo ishte anormale për një ecuri të lojës gati të barabartë dhe ndërkohë që kishte vetem edhe tri minuta lojë.
Edhe në rrjetet sociale kanë vërshuar akuzat ndaj lojtarëve të kombëtares për trukim të ndeshjes ndaj Serbisë. Askush nga stafi i kombëtares por as edhe nga ekipi nuk ka dashur të futet në spiralen e këtij debati. Por gjithsesi ka një reagim i cili ka ardhur nga futbollisti Ergys Kaçe.
Një tifoz shqiptar ka komentuar në profilin e lojtarit Kaçe ku i shprehet se djemtë e shitën ndeshjen ndërkohë e menjëhershme ka qenë përgjigja e Kaçes.
Lojtari i kombëtares ka hedhur poshtë pretendimet për trukim të ndeshjes.
“Ne kurrë nuk mund të shitemi në një ndeshje aq të rëndësishme,unë jam shqiptar si ti dhe e dua Shqipërinë aq shumë sa ti, por mos mendo kurrë që ne nuk kemi luajtur me shpirt. Ne kemi kërkuar golin në çdo minutë të lojës dhe po nuk shënove do pësosh. Shqipëria mbi të gjitha.”, është përgjigjur Kaçe.
