Ndërsa në Shqipëri shitet me 183 lekë, në Maqedoni ajo shitet 60 lekë më pak. Kjo diferencë e madhe e çmimit të naftës, i ka detyruar drejtuesit e mjeteve të udhëtojnë drejt Maqedonisë për ‘tu furnizuar me naftë.
Drejtuesit e automjeteve e kryejnë udhëtmin e tyre në pikën kufitare të Bllatës ku kalojnë nga Dibra që i përket Shqipërisë, në drejtim të Dibrës së Madhe që ndodhet në territorin maqedonas.
Mësohet se në pikat e karburanteve që ndodhen afër kufirit me Shqipërinë, rreth 50% e xhiros ditore bëhet nga drejtuesit shqiptarë të automjeteve.
E megjithatë, çmimi i ulët i naftës në Maqedoni hap rrugën për më shumë spekulime nga shoferët të cilët përpiqen të bëjnë kontrabandë duke mbushur serbatorë shtesë me karburant.
Drejtor i Doganës së Bllatës, Abdulla Kata shprehet: “
Për efekt të një ndryshimi të madh të çmimit në zonën kufitare të Dibrës së Madhe, në këtë kohë kemi një problematikë të madhe prej lëvizjes së automjeteve të shumta. Shumë drejtues dalin nga kufiri, meqë është distancë e afërt, furnizojnë serbatorët me naftë apo benzinë dhe kthehen sërish në vend. Kontrolli dhe synimi i doganierëve ka qenë i fokusuar në faktin që këto lëvizje të shpeshta të mos bëhen me serbatorë shtesë, të cilat i ngarkojnë dhë Maqedoni dhe më pas i shfrytëzojnë për shitje në Shqipëri”.
