Një prej anëtarëve më të rëndësishëm të Organizatës së Moxhahedinëve të Popullit të Iranit vdiq dje në kampin shqiptar të refugjatëve politikë. Mohammad Hadi Taali ndërroi jetë në një spital në Tiranë, nga kanceri në mushkëri, sëmundje e diagnostikuar në vitin 2013 gjatë qëndrimit të tij në kampin e Lirisë në Irak. Taali erdhi në Shqipëri vetëm pak muaj më parë.
Si shkak për vdekjen e tij akuzohet qeveria irakiane e cila sipas një deklarate të organizatës klandestine ngriti embargon mjekësore ndaj anëtareve të organizatës. Taalit iu refuzua mjekimi dhe ilaçet për një kohë të gjatë të qëndrimit të tij në Irak.
Disa qindra anëtarë të kësaj organizate që konsiderohet terroriste nga autoritetet zyrtare në Iran u strehuan në Shqipëri pas një marrëveshje të qeverisë së Tiranës me SHBA dhe Irakun. Muxhahedinët e Popullit kanë luftuar kundër regjimit të mbretit të dikurshëm iranian Pahlevi dhe më pas edhe kundër pushtetit të klerikëve të këtij vendi, duke fituar kështu simpatinë e regjimit të Bagdatit të drejtuar nga Sadam Hyseini. Por pas rrëzimit të tij, në pushtet erdhën aleatë të pushtetit aktual iranian të cilët masakruan një pjesë të kësaj organizate.
FOTO/ Vdes në Tiranë “terroristi” moxhahedin i Iranit
