Ministri i Brendshëm italian Angelino Alfano ka reaguar publikisht pas lajmit të riatdhesimit e të dëbimit të përhershëm të çiftit emigrant shqiptar nga Italia, të akuzuar si propagandues të luftës së shtetit Islamik ISIS.
“Vazhdon aksioni i parandalimit të terrorizmit, shkruan Ministri Alfano në faqen e tij ne Twitter. Dëbohet çifti shqiptar që nxiste xhihadin. Shkon në 45 numri i të dëbuarve nga dhjetori deri më sot.”
Prej më shumë se një viti çifti shqiptar ishte nën mbikëqyrjen speciale të Kuesturës së Peruxhas nën drejtimin e Francesco Moretti.
Hetimet vërtetuan se pozita e çiftit shqiptar shfaqej përherë e me shumë radikale ndaj sjelljeve e zakoneve perëndimore.
Aktivitetin propagandues ndaj xhihadit, çifti shqiptar e kryente jo aq nën internet se sa në takime e mbledhje private që në aparencë ngjanin me vizita mes të njohurish.
Bashkëshorti 32 vjeçar prej kohesh ishte nën shënjestrën e grupit antiterrorist të Policisë Italiane e konsiderohej një element potencialisht i rrezikshëm por që deri me tani nuk ishte parë e arsyeshme ndërhyrja e forcave të rendit.
Ndërsa bashkëshortja e tij 23 vjeçare kishte pak kontakte me botën përreth e dilte përherë e mbuluar e vetëm për të marrë pjesë në takimet propaganduese.
Ministri i Brendshëm i Italisë, Alfano: Dëbuam çiftin shqiptar që nxiste xhihadin, aksioni vijon
