Bixhozi, biznesi i vetëm që “lulëzon” në Shqipëri

Teksa sektorë të tillë si ndërtimi dhe industria po shfaqin dobësi deri në ekzistencë nga efektet ciklike të krizës ekonomike, biznese të tjera po lulëzojnë. Aktivitetet e lojërave të fatit vitin që shkoi edhe pse përballë një aksioni të rreptë policor, njohën një rritje të shpejtë, ku xhiroja e disa kompanive pësoi rritje deri në 80 për qind. Për herë të parë vjet, dy nga kompanitë e lojërave të fatit (Astra Albania, Adriatik Game) u përfshinë për herë të parë në 100 bizneset më të mëdha në vend për nga xhiroja e deklaruar në tatime.
Aktualisht në të gjithë vendin numërohen 5 kompani baste sportive me 3163 pika të tilla (adresa dytësore), sipas të dhënave në Njësinë e Mbikëqyrjes së Lojërave të Fatit.
Numri i madh i pikave të basteve është i përqendruar në pesë kompani. Pikat e basteve (përfshirë adresat sekondare) përbëjnë 80 % të totalit të lojërave të fatit. Sipas të dhënave zyrtare, numri total i pikave të lojërave të fatit (gjithnjë përfshirë adresat sekondare) është 3979.
Gjithashtu janë gjithsej 14 kompani kazino elektronike, që kanë 150 adresa sekondare, një kazino, 5 bingo tradicionale (me 16 adresa sekondare) dhe një lotari kombëtare, me 648 adresa sekondare.