Teksa kërkesa për shtëpitë e pushimit në apartamente është tkurrur ndjeshëm dhe çmimet janë në tendencë rënëse krahasuar me një vit më parë, ideja e blerjes së një shtëpie në një fshat turistik po lulëzon së tepërmi, e shoqëruar me çmime më të kripura
Apartamentet në bregdet mund të konsiderohen si një pjesë e vjetër e dëshirave të shqiptarëve, të cilët në bumin e fillim-viteve 2000, kërkonin të kishin një shtëpi të dytë pushimi, për sezonin veror. Tashmë, interesi është zhvendosur drejt fshatrave turistikë, ku sipas ekspertëve, infrastruktura e mirë, hapësirat e gjelbra, siguria janë arsyet kryesore që apartamentet unike nuk janë më të dëshiruara, po përkundrazi, të gjithë po përpiqen t’i shesin.
Përpjekjet më të mëdha për të “hequr qafe” shtëpitë e dyta në plazh, sipas ekspertëve të fushës, po ndodhin në Durrës dhe ën Shëngjin.
Përkundër këtij fenomeni, interesi për fshatrat turistikë duket me një rritje prej 10 për qind këtë vit, sigurisht, të konsideruara si blerje elitare për shkak të çmimeve më të larta.
Sa u përket çmimeve të zonave kryesore në vendin tonë, ato kanë lëvizur shumë pak për fshatrat turistikë (në rritje), por për zonat e tjera kanë mbetur disi të njëjta, me ulje kryesisht në zonën e vijës bregdetare të Durrësit.
Sipas ekspertëve të tregut imobiliar, tri janë arsyet kryesore për uljen e kërkesës për shtëpi unike në bregdet: zhvillimi i zgjedhjeve lokale, mungesa e të huajve, si dhe ‘lulëzimi’ i fshatrave turistikë (çmimi në të cilat po rritet).
Tendenca e shtëpive në bregdet
– Çmimet për apartamente janë në tendencë rënëse. Ekspertët e tregut pohojnë rënie me 35 për qind të kërkesës në zona si vija bregdetare e Durrësit, Golemi, Shkëmbi i Kavajës, ku çmimet janë më të ulëta dhe koha tani është ideale për ‘pazare’ për çmimin
-Vlora vijon të mbetet me çmimet më të larta në apartamentet unike, ndonëse kërkesa është e njëjtë me vitin e shkuar
-Vëmendja ka shkuar të fshatrat turistikë. E udhëheq listën për nga kërkesa Gjiri i Lalëzit, ndjekur nga kompleksi i Qerretit, sidomos për banorët e Tiranës, pohojnë ekspertët. Sipas tyre, arsyet janë infrastruktura e mirë, hapësirat e gjelbra dhe siguria që shtyjnë qytetarët të bëjnë blerje të tilla.
-Projekte të reja të fshatrave turistikë po vijnë, duke ofruar kështu mundësi për blerje dhe pritet sërish një rritje interesi për to, e shoqëruar nga një rënie interesi për apartamentet unike dhe njëkohësisht një rënie e çmimit për to.
-Zhvillimi i zgjedhjeve lokale këtë vit pritet të frenojë blerjet e shtëpive në bregdet dhe konsiderohet një ndër arsyet për rënien e kërkesës këtë vit, duke i shtuar kësaj liste edhe mungesën e të huajve që kanë ulur kërkesën.
Çmimet e apartamenteve në bregdet, sipas zonave *
Shëngjini: 350 – 500 euro/m²
Durrësi (zona e plazhit, Golemi): 350 – 500 euro/m²
Gjiri i Lalëzit (fshatra turistikë): 900 – 1200 euro/m²
Qerreti (fshatra turistikë): 800 – 1000 euro/m²
Vlora: Mbi 800 euro/m²
Uji i Ftohtë: 450 – 700 euro/m²
Orikum – Radhimë: 650 – 1000 euro/m²
Dhërmiu: 800 – 1000 euro/m²
Himara: 600 – 800 euro/m²
* Burimi: Agjencitë kryesore imobiliare në vend
(Monitor)
