Ministri i Jashtëm grek, në fund të qershorit në Tiranë: Fat për Greqinë që ka emigrantë nga Shqipëria

Ministri i jashtëm grek, Nikos Kotzias, tha se do të vizitojë Tiranën në fund të qershorit, gjatë një takimi informal me korrespondentët e huaj të akredituar në Athinë.
I pyetur për detaje nga korrespondenti i abcnews, Robert Goro, Kotzias tha se vizita do të jetë pjesë e një turi që ai do të zhvillojë në Ballkanin Perëndimor.
“Ende nuk janë fiksuar datat e vizitave dhe për këtë po punohet me ministritë homologe”, shtoi Kotzias.
Sipas ministrit të jashtëm grek, gjatë takimeve në kryeqytetet fqinje, do të shqyrtohen edhe problemet ekzistuese në marrëdhëniet dypalëshe, ku Athina do të shprehë predispozicionin pozitiv për zgjidhjen e tyre.
Ftohtësia e raporteve zyrtare mes dy Shqipërisë dhe greqisë, kohët e fundit, nuk e ka zbehur konsideratën e lartë që vetë ministri i jashtëm grek ka për shqiptarët në përgjithësi, dhe emigrantët shqiptarë në veçanti.

I pyetur nga një korrespondent i medias gjermane, mbi rrezikun e infiltrimit të xhihadistëve nga Shqipëria, Kosove dhe Maqedonia, Kotzias e ka mohuar këtë rrezik dhe ka shpjeguar përse:
“Kam miq shumë emigrantë shqiptarë. Në Universitetin e Pireut, kam patur dhe kam shumë studentë nga Shqipëria, shumica e tyre janë ndër studentët më të shkëlqyer. Mund t’ju garantoj se shqiptarët dhe jo vetëm ata të Shqipërisë, nuk janë një popull fondamentalist, siç mund t’i paraqesin mediat ndërkombëtare apo dhe këtu në Greqi. Janë njerëz shumë të hapur, punëtorë të ndershëm dhe miq besnikë. Unë e konsideroj fat për Greqinë që ka emigrantë nga Shqipëria dhe vende të tjera të Ballkanit”, tha ministri i jashtëm grek dhe vazhdoi: “Dje firmosa draftin për dhënien e nënshtetësisë greke brezit të dytë, nga dispozitat e të cilit përfitojnë në masë të madhe fëmijtë e emigrantëve shqiptarë. U ndjeva mirë kur hodha firmën time në atë draft”, u shpreh Kotzias, që ngjante shumë i sinqertë në fjalët e tij
.(tribuna shqiptare)