Shqipëria planifikon të ofrojë një eurobond të ri së shpejti, i cili planifikon të zhvendosë varësinë nga financimi i brendshëm tek investitorët e huaj. Zëvendës ministri i Financave Erjon Luçi, i tha tv së njohur të biznesit Bloomberg se qeveria e kryeministrit Edi Rama do të shesë 300 milionë euro në tregjet ndërkombëtare dhe mund të rrisë kërkesën në rast se do të ketë kërkesë të mjaftueshme.
“Ne do fillojmë me 300 milionë euro eurobonde për të paguar emetimin ekzistues,” tha Luçi. “Por, nëse ka një reagim pozitiv, kjo shumë mund të arrijë deri në 500 milionë euro”.
Shqipëria, e cila po punon që të hyjë në Bashkimin Europian, ka nevojë të nxisë rritjen ekonomike, të konsolidojë financat publike dhe të reduktojë borxhin publik në 60% të PBB-së deri në 2019-n, në bazë të programit që ka me FMN.
Shitja e bonove do të jetë më shumë një pagesë e eurobondit aktual dhe ushtrim i menaxhimit të borxhit, për shkak se qeveria është mjaft likuide, tha ai. Shteti ka gjithashtu një program mbështetës prej 250 milionë euro nga Banka Botërore në formën e një garancie, që mund të përdoret si amortizator në rast se kushtet e tregut përkeqësohen, tha ai.
Marrja e borxhit për të paguar borxh në të njëjtat terma mund të sjellë efektin e kundërt, rrit borxhin edhe më shumë. Ndërkaq rritja e varësisë së borxhit nga investitorët e huaj pakëson mundësitë e qeverisë për të futur në lojë mekanizma që ulin sadopak ngarkesën e borxhit.
