Nisin punimet për gazsjellësin TAP, në dy dekada 1 miliard euro për Shqipërinë

Në Potom të Skraparit u zhvillua sot ceremonia përuruese e nisjes së punimeve për ndërtimin e gazsjellësit TAP.
Në fjalën e mbajtur me këtë rast, kryeministri Edi Rama nënvizoi disa efekte pozitive të projektit, që ai tha se në dy dekada do sigurojë 1 miliard euro për Shqipërinë.
Kjo është faza e parë e investimit, që lidhet kryesisht me ndërtimin e infrastrukturës.
“Pas kësaj faze do të nisë ndërtimi i tubacioneve kryesore dhe gazsjellësi do të përshkojë 211 km në truallin shqiptar. Në këtë fazë vlera e investimit është e konsiderueshme dhe krijon në mënyrë të drejtpërdrejtë më shumë se 800 vende të reja pune, ndërkohë që mijëra të tjera do jenë rezultat i marrëdhënieve indirekte me këtë projekt”, tha Rama.
Nga ky investim, Qarku i Beratit dhe ai i Fierit janë përfituesit kryesorë dhe të drejtpërdrejtë, ku veç kalimit të gazit, Rama nënvizoi edhe rregullimin e infrastrukturës rrugore. Kryeministri foli edhe për masterplanin për gazifikimin e vendit, ku tha se po punohet ngushtë me aksionerët e TAP-it për të studiuar kushtet teknike dhe financiare për këtë plan.
Ndërkohë, ministri i Energjetikës, Damian Gjiknuri e cilësoi si historike nisjen e punës për këtë gazsjellës.
Ministri i Energjetikës shprehu zotimin e autoriteteve shqiptare për të shmangur çdo pengesë burokratike për investitorët.