Shefi i opozitës, Lulzim Basha takoi sot pasdite Nën Sekretaren amerikane të Shtetit për Çështjet Evropiane dhe ato Euroaziatike, zonjën Victoria Nuland me të cilin ka biseduar për standardet e demokracisë në Shqipërisë. Duke folur për zgjehdjet e 21 qershorit, Basha tha se ka informuar Nuland me dhunimin e këtij procesi sic deklaron edhe raporti paraprak i OSBE dhe deklarata e ambasadës së SHBA pas zgjedhjeve. Basha tha se ka informuar Nuland për presionin mbi votuesit, administratën zgjedhore, opozitën, pati përfshirje masive të kriminelëve dhe kandidim të njerëzve me rekorde kriminale.
Kryetari i PD-së tha se mbetja në vend e procesit të kriminalizimit, problemi i madh i korrupsionit që i ka kushtuar vendit në 6 muaj 150 milionë dollarë në dogana dhe tatime, probleme që lidhen me prapësimin e procesit demokratik kanë dominuar bisedën me Nuland.
Kam marrë mbështetjen e plotë të SHBA, tha Basha për median fill pas takimit, për platformën e PD për të trajtuar këto probleme të demokracisë shqiptare, vecmas dekriminalizimin.
Kemi kërkuar që ata që janë me rekorde kriminale të largohen nga pushteti lokal dhe parlamenti. Do të propozojmë që të pengohet dhe kandidimi i tyre në zgjedhjet e ardhshme. Do të hedhim sërish këto propozime në Parlament me mbështetjen e plotë të SHBA dhe BE.
Basha tha se Nuland ka vlerësuar rolin dhe vizionin e kësaj partie si dhe kryetarit të saj për ti ofruar shqiptarëve, një platformë të denjë për një Shqipëri të shekullit 21.
