Komisioni i Ligjeve miratoi në parim ndryshimet në Kodin Penal që ashpërsojnë masat ndëshkuese në kuadër të operacionit të Qeverisë kundër informalitetit. Opozita votoi kundër duke i cilësuar këto masa si terror ndaj qytetarëve me synimin për të goditur biznesin. Në mbledhjen e sotme, ra në sy mungesa e deputetëve të LSI-së.
Burgu bëhet përsëri kryefjala e Qeverisë. Dy ministra prezantuan ndryshimet në Kodin Penal që ashpërsojnë masat ndëshkuese në kuadër të operacionit kundër informalitetit. Në pjesën më të madhe të rasteve hiqet opsioni i gjobës dhe kalohet direkt pas hekurave, gjë që në sytë e opozitës ngjan si terror ndaj qytetarëve.
Kundër Qeverisë doli edhe një aleat i ri mazhorancës, Nard Ndoka.
Këtij i dha një paralajmërim Pandeli Majko, duke e ftuar të bëjë kujdes.
Deputetët e majtë mbrojtën projektligjin duke hedhur poshtë pretendimet e opozitës, sipas së cilës qëllimi i draftit është të ndëshkojë bizneset.
Komisioni i Ligjeve miratoi ndryshimet në parim me votat e shumicës së majtë, ndërsa opozita votoi kundër.
LSI braktis PS gjatë miratimit të masave ndëshkuese kundër informalitetit
