Mbledhja e grupit parlamentar të PD-së sot është shoqëruar me një debat në të cilin janë përfshirë me tone të ndryshme Basha, Ruli, Berisha, Bregu, Imami, Paloka dhe Spaho.
Fillimisht ish-ministri Genc Ruli ka ngritur cështjen e disa deklaratave të kryetarëve të degëve të cilët akuzojnë ish-ministrat për korrupsion. Ai i kërkoi Bashës që ata të tregohen më të përmbajtur në reagimet e tyre në “Facebook” dhe të mos etiketojnë ish-ministrat e PD-së.
Ruli ka këmbëngulur që të ketë edhe penalitete ndaj tyre. Kryetari Basha ka qenë dakord në parim që të mos ekstremizohet debati në cështje të tilla por ndërkaq i ka thënë Rulit se më shumë se debate janë fryrje që vijnë nga mazhoranca për ta hequr vëmëndjen nga skandalet e saj. Sot problem është CEZ dhe ministrat trafikantë në qeveri, ka theksuar Basha.
Në debat është përfshirë edhe ish-ministri tjetër, Arben Imami i cili ka kërkuar që debati të jetë më etik nga kryetarët e rinj të degëve. Në vijim ish-Kryeministri Berisha ka thënë se debat në PD duhet të ketë dhe se ai debat nuk mund të ndalet. Por kjo nuk do thotë të hiqet vëmendja nga cështje të tjera madhore.
Genc Ruli ka lënë më pas mbledhjen por jo prirjen për debat brenda mbledhjes. Ish-Ministrja Majlinda Bregu tha se niveli i debatit brenda PD-së, po ndihmon më shumë kundërshtarët se partinë.
Në vijim ka ndërhyrë nënkryetari i parlamentit,Edmond Spaho i cili ka theksuar se kjo nuk është një cështje që kërkon kaq shumë vëmendje i ndjekur më pas nga nënkryetari i PD. Edi Paloka i cili tha se janë të tjera cështje që duhet të shqetësojnë opozitën, dhe ato cështje janë në qeveri.
Dy dite me pare kryetari i PD ne Lushnje Myslym Murrizi postoi nje shenim sipas te cilit ministrat e PD-se kur u bene me pare lane grate dhe moren dashnoret.
