Në vijim të denoncimit të lidhjeve të ministrit të brendshëm Saimir Tahiri me krimin, ka vijuar sot denoncimin në emër të PD-së,Enkelejd Alibeaj, kreu i Departamentit të Rendit e Sigurisë në këtë parti.
“Corriere della Sera, gazeta prestigjioze dhe ndër më të rëndësishmet në Europë i ka bërë të ditur miliona lexuesve të saj se ministri ynë i Brendshëm gjendet nën akuzë për lidhje me bandat më të rrezikshme të drogës në vend. Shtypi më serioz në Itali dhe në Europë ekspozon të vërtetën tronditëse: se në Shqipëri sundon Mafia e lidhur me Qeverinë. Se narkobandat drejtojnë bashkë me Saimir Tahirin. Se mafia e lidhur me ministrin e Brendshëm eliminon oficerët që guxojnë të flasin, që guxojnë të luftojnë trafikun e drogës”, u shpreh Alibeaj.
Sipas tij, krimi është në gjendjen më kritike për shkak të lidhjeve të dyshimta të ministrit.
“Shqipëria është në gjendjen më të rëndë kriminale në 25 vite, sepse krimi ka kapur shtetin, sepse interesat e krimit sundojnë vendin. Akuzat, provat dhe dëshmitë e pakontestueshme, të gjitha të çojnë te Tahiri i habilajve dhe shullazëve me shokë. Tek Tahiri me kushërinjtë Habilaj që vëzhgoheshin nga policia dhe oficeri i lartë Zagani, i cili gjendet sot i kërcënuar me jetë. Tek Tahiri që i ka dorëzuar pikat kyçe si shefin e kufirit të Dhërmiut aty ku paketohet droga e bëhet gati për Itali, në shërbim të bandave. Tek Tahiri që makinën personale e të paprekshme e ka vënë si narkotaksi në shërbim të bandës së Habiljave”, vijoi Alibeaj.
Duke akuzuar kryeministrin Rama si më të korruptuarin në Ballkan, Alibeaj shton se Tahiri është një nga më të akuzuarit për lidhje me krimin, për të cilin ka ripërsëritur kërkesën për largimin e tij.
“Kurrë më parë nuk ka qenë një ministër i Brendshëm shqiptar nën akuza kaq të rënda dhe me fakte të pakundërshtueshme si kumbar dhe mbrojtës i trafikut të drogës. Por e gjithë kjo e bën krenar Edi Ramën. Kryeministrin më të korruptuar në Ballkan, njeriun e përfolur si bashkëpunëtor i hershëm i bandave të drogës të cilave u dha tregun e ndërtimeve të Tiranës si kryebashkiak e për të cilin raporti i punës së OSBE thotë se ka një pasuri prej 200 milion eurosh. Trupa e policisë që lufton krimin, oficerët, burrat dhe gratë në uniformë janë të tradhtuar e kokulur. Qytetarët janë të pa sigurt, të nëpërkëmbur dhe të poshtëruar. Ka vetëm një rrugë. Largimi i narkoministrit Tahiri dhe shefit të tij protektor që refuzon testin e drogës”, përfundoi Enkelej Alibeaj.
Në Shqipëri sundon mafia e lidhur me qeverinë, e vetmja rrugë largimi i narkoministrit dhe shefit të tij
