Nga studio e emisionit “Opinion”, ministri i Drejtësisë, por edhe një nga drejtuesit e lartë të LSI-së, pranoi se midis dy aleatëve Edi Rama dhe Ilir Meta ka pasur një tensionim të marrëdhënieve midis tyre, “diku nga mesi i vitit”.
Për sa i përket këtij tensionimi, Ylli Manjani zbuloi se ndodhi, “për problemet e administrimit të pushtetit lokal. Nuk di ta them, në se kishte lidhje me aferën DIA dhe Kastriot Ismailin. Mund të kenë qenë të lidhura këto tensione e pakënaqësi edhe me qeverisjen, për të cilën takimet periodike, duket se po e zgjidhin këtë problem”.
Manjani pranoi se ky realitet ekziston ende dhe se takimet dhe kontaktet e vazhdueshme janë në funksion të zgjidhjet të këtij problemi.
Manjani përmendi shkaras si shkak të tensionimit të marrëdhënieve Rama – Meta edhe zgjedhjet në Shkodër, sipas të cilit “ishte rënë dakord që e majta të dilte e unifikuar”, duke lënë të kuptojë se nuk ka ndodhur.
I pyetur në se LSI mund të dalë e vetme në zgjedhje Manjani u përgjigj me një kundërpyetje, “Ju mendoni se LSI, nuk është e aftë të dalë e vetme në zgjedhje?”.
E akuzuar si forcë LSI, për shitblerjen e votës, Manjani pohoi se “ne kemi bërë distancim të qartë nga biznesmenët dhe të fortët e lagjes”.
Manjani: Ja pse u tensionuan marrëdhëniet Rama – Meta
