Të paktën dy shpërthime kanë tronditur kryeqytetin belg sot rreth orës 14:00 gjatë një operacioni të policisë në zonën e njohur si Schaerbeek. Mediat lokale raportojnë se policia ka arritur të neutralizojë një person.
Gjashtë persona janë arrestuar në lidhje me sulmet terroriste në Bruksel, që lanë të vdekur së paku 31 njerëz dhe rreth 270 të tjerë janë lënduar. Sakaq, një tjetër terrorist është shpallur në kërkim. Bëhet fjalë për sirianin Naim Al Hamed, 28 vjeç, ndërsa cilësohet nga policia si tepër i rrezikshëm.
Naim Al Hamed është shpallur në kërkim dhe dyshohet se ka pasur lidhje të ngushta me Mohamed Abrinin, Najim Lacharaoui dhe vëllezërit El Bakraoui. Kjo është edhe fotoja e 28-vjeçarit sirian, i cili bredh ende i lirë dhe dyshohet se ndodhet në Bruksel. Sipas prokurorëve belgë, operacioni policor i orëve të fundit është bërë në afërsi të Brukselit, ku u konkretizua me arrestimin e 6 personave. Ata janë arrestuar në vendin ku ditë më parë u gjetën disa eksplozivë dhe besohet se kanë ndihmuar sulmuesit të martën në tri sulmet në aeroport dhe metro të Brukselit. Atyre thuhet se u është gjetur sasi e madhe eksplozivi dhe materiale tjera që lidhen me bomba.
Në valën e arrestimeve për identifikimin dhe kapjen e autorëve të sulmeve në Bruksel, në Gjermani janë arrestuar sot dy të dyshuar. Lajmi është bërë i ditur nga mediat gjermane.
Bruksel, dy shpërthime të tjera, policia dhe ushtria në operacion neutralizon një person
