Banorët e Rrjollit kanë vijuar edhe sot protestat kundër ndërtimit të resortit në zonë dhe kundërshtimin e tyre ndaj projektit që po ndërtohet mbi pronat e tyre.
Sipas raportimeve nga vendngjarja, protestuesit kanë çarë një pjesë të rrethimit të vendosur rreth kantierit të ndërtimit dhe janë futur brenda zonës ku po zhvillohen punimet. Më pas janë regjistruar tensione dhe përplasje me forcat e policisë, të cilat kanë ndërhyrë për të mbajtur situatën nën kontroll.
Në disa momente, banorët kanë akuzuar efektivët e policisë se i kanë shtyrë gjatë përpjekjeve për t’i larguar nga kantieri. Mes thirrjeve kundër projektit, protestuesit janë dëgjuar të brohorasin: “Ju erdhi fundi hajdutëve”.
Banorët kanë tentuar gjithashtu të bllokojnë makineritë që po kryejnë punimet për ndërtimin e resortit, ndërsa policia ka ndërhyrë për të shmangur ndërprerjen e aktivitetit në kantier.
Gjatë protestës janë shfaqur edhe pankarta me mesazhe kundërshtuese, ku një prej tyre mbante sloganin: “Jemi fëmijët e Rrjollit, toka nuk preket!”.a.b
.
