Për të hetuar aktivitetin kriminal të dyshuar të Ilir Shtufit dhe Artur (Luçiano) Koçekut, SPAK ka marrë deklarime edhe nga dëshmitari i drejtësisë, Erion Alibej.
Në dëshminë e tij, Alibej ka treguar se njohja me biznesmenin Ilir Shtufi është krijuar përmes Artur Koçekut, me të cilin ky i fundit kalonte pjesën më të madhe të kohës. Sipas tij, nga bisedat që ka zhvilluar me të dy, ka mësuar se Shtufi ishte prej vitesh aktiv në fushën e ndërtimit.
Alibej deklaron se, në periudhën kur Ilir Shtufi lidhi shoqëri me Artur Koçekun, aktiviteti i tij ekonomik pësoi rritje të ndjeshme. Sipas dëshmitarit të drejtësisë, para kësaj periudhe Shtufi përballej me probleme financiare, borxhe ndaj personave të ndryshëm, detyrime të papaguara për materiale ndërtimi, si dhe probleme ligjore që lidhen me shitjen e dyfishtë të apartamenteve dhe dyqaneve.
Sipas deklarimeve të Alibejt, Artur Koçeku i kishte ardhur në ndihmë Shtufit me shuma të konsiderueshme parash cash, duke i mundësuar shlyerjen e borxheve, zgjidhjen e problemeve me drejtësinë dhe largimin e personave që i vendosnin gjoba. Ai tha se këto fakte i kishte mësuar si nga diskutimet në rrethin e tyre shoqëror, ashtu edhe nga komunikimet e drejtpërdrejta me Koçekun.
Dëshmitari i drejtësisë ka deklaruar gjithashtu se Artur Koçeku i kishte pohuar personalisht se po investonte në sektorin e ndërtimit së bashku me Ilir Shtufin, duke e financuar me shuma të mëdha monetare në cash.
Sipas Alibejt, në ambientet e ndërtimit të administruara nga Shtufi, Koçeku sillej si pronar dhe ushtronte ndikim të drejtpërdrejtë mbi projektet. Ai shton se më vonë, në këto investime janë futur para cash edhe nga persona të tjerë të përfshirë në trafikun e narkotikëve, të cilat dyshohet se janë investuar në objekte të ndryshme ndërtimore të realizuara nga Ilir Shtufi.
Këto deklarime janë pjesë e dosjes hetimore të SPAK-ut për grupin e dyshuar kriminal që akuzohet për trafik ndërkombëtar kokaine dhe pastrim të produkteve të veprës penale përmes investimeve në pasuri të paluajtshme dhe sektorin e ndërtimit.
