Gjykata e Posaçme e Apelit për Korrupsionin dhe Krimin e Organizuar ka lënë në fuqi masën e sigurisë “pezullim nga detyra” ndaj ish-zëvendëskryeministres dhe ish-ministres së Infrastrukturës dhe Energjisë, Belinda Balluku.
Balluku kishte ankimuar vendimin e Gjykata e Posaçme kundër Korrupsionit dhe Krimit të Organizuar (GJKKO), e cila vendosi pezullimin e saj nga funksionet shtetërore pasi u akuzua nga Struktura e Posaçme kundër Korrupsionit dhe Krimit të Organizuar (SPAK) për shkelje të barazisë në tendera.
Çështja u shqyrtua nga trupa gjykuese monokratike e Apelit të Posaçëm, e përbërë nga gjyqtarja Miliana Muça, e cila vendosi të miratojë vendimet e mëparshme të shkallës së parë, duke lënë në fuqi masën e sigurimit personal me karakter ndalues “pezullimi i ushtrimit të një detyre a shërbimi publik”, të parashikuar nga neni 242 i Kodit të Procedurës Penale.
Me këtë vendimmarrje, tashmë janë tre gjykata që e konsiderojnë të ligjshme kërkesën e SPAK për pezullimin nga detyra të Ballukut.
Më herët, Apeli i Posaçëm kishte pezulluar shqyrtimin e ankimit deri në një vendimmarrje të Gjykata Kushtetuese e Shqipërisë. Pasi kjo e fundit la në fuqi pezullimin, duke rrëzuar pretendimet e kryeministrit Edi Rama, Apeli vendosi të rihapë çështjen dhe të japë vendimin përfundimtar.
Nga ana tjetër, avokati i Ballukut, Ardian Kalia, deklaroi se kjo seancë nuk duhej të zhvillohej, pasi sipas tij çështja tashmë nuk kishte më objekt. Ai argumentoi se ekziston një dekret për shkarkimin e saj nga detyra, çka sipas mbrojtjes e bën të pavlefshme shqyrtimin e masës së pezullimit.
Balluku është shkarkuar nga funksionet që mbante në qeveri, atë të zv.kryeministres dhe të ministres së Infrastrukturës dhe Energjisë.a.b
