Prokuroria e Posaçme kundër Korrupsionit dhe Krimit të Organizuar, SPAK, ka zbardhur vrasjen e Gentian Qarri, e ndodhur pesë vite më parë në Vlorë, duke lëshuar 7 urdhër-arreste për persona të dyshuar si të përfshirë në këtë ngjarje.
Sipas burimeve, të paktën dy prej masave janë ekzekutuar brenda burgut, pasi personat ndodheshin të arrestuar për çështje të tjera. Ndër personat për të cilët janë lëshuar urdhër-arreste janë edhe Ines Hajrullar dhe Ervis Hajrulla.
Këta të fundit kanë qenë më herët objektiv i një atentati të dështuar disa vite më parë, kur Amarildo Nikolli, personi që dyshohej se do të kryente vrasjen me porosi të Leonard Luzi, u arrestua para se të realizonte planin.
Vrasja e Gentian Qarri ndodhi mbrëmjen e 6 shkurtit 2021 në Vlorë. Autorët mbërritën në vendngjarje me një automjet tip “Toyota Yaris” dhe qëlluan drejt tij rreth 20 herë, ku 6 plumba e goditën në trup, duke i shkaktuar vdekjen. Qarri ishte kthyer në Vlorë rreth tre vite para ngjarjes, pasi kishte vuajtur një dënim me 11 vite burg në Itali për trafik droge.
Hetimet që çuan në goditjen e grupit të lidhur me Ines Hajrulla janë mbështetur kryesisht në të dhënat e përftuara nga aplikacioni i koduar Sky ECC. Operacioni vijon ende dhe nuk është konfirmuar zyrtarisht se sa prej masave të sigurisë janë ekzekutuar deri tani.
Mes urdhër-arresteve të firmosura nga SPAK është edhe ai ndaj Flodian Plaku, i njohur me nofkën “Poli Qorre”, i cili ndodhet aktualisht në burg. Ai dyshohet si vrasës me pagesë dhe është arrestuar në gusht të vitit 2025 për përfshirjen në eliminimin e Gentjan Bejtja. a.b
